ახალი, 2024 წელი ტექნოლოგიურმა სექტორმა ხელოვნურ ინტელექტში გაორმაგებული თანხების ინვესტირებით დაიწყო. ამის შესახებ CNN-ის ვებ-გვერდზე ვკითხულობთ. გამოცემის მიხედვით, ამ ამბავს პარალელურად ემთხვევა ისიც, რომ ინდუსტრია დასაქმებულებს სამსახურიდან ათავისუფლებს და ხალხი ამ ფაქტს სწორედ AI-ს უკავშირებს.
AI-ის შემქმნელ ინდუსტრიაში ამ ყველაფერს შედეგად უკვე მოჰყვა ე.წ. “შრომითი აჯანყებები”, რადგან ტექნოინდუსტრია მკაფიოდ პროგნოზირებს, რომ “უახლოეს მომავალში ბიზნეს ლანდშაფტს სწორედ ხელოვნური ინტელექტი შეცვლის.”
Layoffs.fyi-ს მიერ შედგენილი მონაცემების თანახმად, 2024 წლის პირველი ორი კვირის განმავლობაში, ტექნოლოგიური სექტორიდან 5500-მდე დასაქმებული გათავისუფლდა. ეს რიცხვი თანაბრად ნაწილდება როგორც მსხვილ კომპანიებზე, ასევე – სტარტაპებზეც. სამსახურებრივი გათავისუფლებები Google-სა და Amazon-ში დასაქმებულებსაც შეეხოთ: საუბარია სხვადასხვა ბიზნეს დეპარტამენტიდან ასობით თანამშრომლის დათხოვაზე. ამ სიახლეს კი წინ უძღვოდა განცხადებები – ხელოვნური ინტელექტის სტარტაპ Anthropic-ში მრავალმილიარდიანი ინვესტირების შესახებ.
მიმდინარე კვირას სოციალურმა პლატფორმა Discord-მაც განაცხადა დასაქმებულთა 17%-ის შემცირებაზე; ხოლო თანამშრომელთა 25%-ს სამსახურიდან ათავისუფლებს კიდევ ერთი ტექნოლოგიის მწარმოებელი კომპანია – Unity Software, რომელიც ისეთ პოპულარულ მობილურ თამაშებში გამოიყენება, როგორიცაა Pokemon Go. ამ კომპანიების რიგებშია ენების შემსწავლელი აპლიკაცია Duolingo-ც, რომელმაც ხელშეკრულება დასაქმებულთა 10%-ს აღარ გაუგრძელა.
თანამშრომელთა ამ რაოდენობით გათავისუფლებას Layoffs.fyi-ში იმით ხსნიან, რომ პანდემიის შემდგომ პერიოდში ტექნოლოგიურმა კომპანიებმა უამრავი ახალი ადამიანი დაასაქმეს, ამ ეტაპზე კი “ამ გადაჭარბებული რიცხვების დაბალანსების დრო დადგა”. შეგახსენებთ, რომ სწორედ COVID 19-მა პანდემიამ გამოიწვია ციფრულ სერვისებზე მოთხოვნის მკვეთრი ზრდა: მთელი მსოფლიოს მასშტაბით ხალხი იძულებული გახდა, ძირითადად, ონლაინ სერვისებით ესარგებლათ, რამაც ინდუსტრიაში დამატებითი მუშახელის დაქირავების საჭიროება გააჩინა. პანდემიური შეზღუდვების შემსუბუქების შემდეგ კი სექტორში მაკროეკონომიკური გაურკვევლობა წარმოიშვა, რამაც საბოლოოდ დღის წესრიგში ათი ათასობით სამუშაო ადგილის შემცირება დააყენა.
გასულ წელს, სწორედ ხელოვნური ინტელექტი გახდა იმის საფუძველი, რომ კომპანიებს თანამშრომლებისთვის ხელშეკრულებები აღარ გაეგრძელებინათ და როგორც ვხედავთ, მათ ინვესტირება სწორედ AI-ში ამჯობინეს. ინდუსტრიის წამყვანი და გიგანტი ტექნოლოგიური კომპანიები აცხადებენ, რომ ამ ნაბიჯით თავიანთი სერვისები გაცილებით უფრო ეფექტური და მაღალხარისხიანი გახდება.
