გასულ კვირას ლას-ვეგასში Consumer Electronics-ის გამოფენა გაიმართა, სადაც ტექნოლოგიურმა გიგანტმა კომპანიებმა ხელოვნური ინტელექტის მქონე უცნაური გაჯეტები და ინოვაციური მოწყობილობები წარმოადგინეს. ყველაზე საინტერესო გაჯეტების სიაში აღმოჩნდა ბალიში, რომელიც ხვრინვის შემცირებას უწყობს ხელს; ასევე სარკე, რომელსაც ადამიანის სახიდან განწყობის ამოცნობის ფუნქცია აქვს. გამოფენაზე დამსწრეთა ყურადღება მიიქცია გამჭვირვალე ტელევიზორმა და, ასევე, ავტომობილის სარკეებმაც, რომელიც მძღოლის თვალებს აკონტროლებს. Consumer Electronics-ის გამოფენის შესახებ ვრცლად CNN წერს.
ტექნოლოგიური ინდუსტრიით დაინტერესებულთა შეფასებით, ღონისძიება წლის ყველაზე დიდი კონფერენციაა, რომლის მიმდინარეობისას შოუს მოედანზე შეხვდებით არაერთ რობოტს. ისინი მოძრაობენ, ფანტასტიურ პრეზენტაციებს აწყობენ და მაყურებელს უამრავ უცნაურ პროდუქტს სთავაზობენ. ახლა კი გაგაცნობთ Consumer Electronics-ის გამოფენის ყველაზე “ხმაურიან” მოწყობილობებს:
AI კომპანიონები
AI კომპანიონები 2024 წლის მთავარ ტენდენციად დასახელდა. კომპანიონობაში ისეთი მოწყობილობები იგულისხმება, რომლებიც მთლიანად ხელოვნური ინტელექტითაა აწყობილი. ასეთია, მაგალითად, Loona – $380-იანი ძაღლის მსგავსი რობოტი, რომელიც მსოფლიოში პირველი რობოტია ChatGPT ტექნოლოგიით, რაც მომხმარებლებს საშუალებას აძლევს, მოწყობილობას ესაუბრონ. ხალხს მასთან თამაშიც შეუძლია, ასევე რობოტ ძაღლს, ჩვეულებრივის მსგავსად, ბრძანებების მოსმენის უნარიც აქვს.
Loona-ს მსგავსად, საინტერესოა LG-ის შექმნილი რობოტი – Rosie-ც. რობოტი ხელოვნური ინტელექტის ასისტენტია, რომელიც მფლობელს სახლის საქმეებში დაეხმარება და აქვს უნარი, რომ ადამიანებს მედიკამენტების მიღების დრო შეახსენოს.
LG-ის არც Samsung-ი ჩამოუვარდება AI რობოტით, სახელად Ballie. მას შეუძლია თვალყური ადევნოს მომხმარებლის სახლს, უპასუხოს სატელეფონო ზარებს, იზრუნოს შინაურ ცხოველებზე და პროექტორის მეშვეობით, იატაკზე ან კედლებზე ფილმები ან ვიდეო ზარები აჩვენოს.
Consumer Electronics-ის გამოფენაზე დამსწრეთა ყურადღება კიდევ ერთმა, მომცრო ზომის მოწყობილობამაც მიიქცია. ეს სტარტაპ Rabbit’s-ის $199-იანი ჯიბის ზომის AI კომპანიონია, რომელიც სმარტფონის აპლიკაციებთან ერთად მუშაობს. ღილაკზე დაჭერით შეგიძლიათ, რობოტს სთხოვოთ სხვადასხვა კერძის რეცეპტი, ავიაბილეთების დაჯავშნა და ზარების განხორციელება.
AI დავალების რობოტები
კომპანიონების გარდა, გამოფენაზე უხვად იყო წარმოდგენილი დავალებების შემსრულებელი AI მოწყობილობებიც. ასეთებია, მაგალითად, რობოტები, რომელთაც გაზონის გაკრეჭა ან გზიდან თოვლის გაწმენდა შეუძლია; ან უბრალოდ მტვერსასრუტის ფუნქცია აქვს.
მაყურებელმა იხილა ისეთი AI მოწყობილობებიც, რომელთაც ფსიქიკური ჯანმრთელობის მართვა შეუძლია. ასეთია Baracoda-ს სარკე, რომელიც მომხმარებლის განწყობას აიდენტიფიცირებს და ყოველდღიურ რჩევებსაც იძლევა, რათა თავი უკეთ იგრძნოთ. Holobox-ის AI მოწყობილობა კი ადამიანებს საშუალებას აძლევს, სხვებს მსოფლიოს სხვადასხვა კუთხეში რეალური ჰოლოგრამის საშუალებით ესაუბრონ, რაც ქმნის შთაბეჭდილებას, რომ ორი სხვადასხვა ადამიანი ერთსა და იმავე ოთახშია.
ხელოვნურ ინტელექტს ასევე იყენებს Apple-იც. ახალი Qi2 & DockKit Auto Tracking Stand არის პირველი გაჯეტი, რომელიც იყენებს iPhone-ის სახის ამოცნობის ტექნოლოგიას, რათა თვალყური ადევნოს სახეებსა და სხეულის მოძრაობებს ვიდეოების გადაღების დროს.
ერთი სიტყვით, დღესდღეობით ხელოვნური ინტელექტი უკვე ფართოდ გამოიყენება როგორც ადამიანების დამხმარე ასისტენტებად, ასევე ჩვენს ჯანმრთელობაზე საზრუნავად, ავტომობილის და სხვადასხვა ყოველდღიურად საჭირო მოწყობილობის ფუნქციების გასაუმჯობესებლადაც კი. გაჯეტების შესახებ დეტალურ ინფორმაციას კი თავად CNN-ის სტატიაში გაეცნობით.
