ხელოვნური ინტელექტის გამოყენებით დაინტერესებული კომპანიების რიგებს ახლა უკვე სწრაფი კვების ინდუსტრიაც შეუერთდა: ამ შემთხვევაშიც AI-ს მომხმარებელთა გამოცდილების გაუმჯობესება და რიგი ოპერაციების გამარტივება აკისრია. თუმცა, იმის გათვალისწინებით, რომ ინდუსტრიაში ხელოვნური ინტელექტის დანერგვამ კარგი პროგრესი აჩვენა, რიგი გამოწვევები მაინც რჩება…
CNN-ის ინფორმაციით, აშშ-ში McDonald’s-მა ცოტა ხნის წინ ხელოვნურ ინტელექტზე დაფუძნებული ხმოვანი ავტომატური შეკვეთის ტექნოლოგიის გამოყენება დროებით შეაჩერა. ეს მოწყობილობა შტატების მასშტაბით McDonald’s Thru-ს 100-ზე მეტ ობიექტში გადიოდა ტესტირებას. სწრაფი კვების კომპანიის ინფორმაციით, რესტორნის ქსელებში AI-ის ინტეგრაციის შეჩერების მიზეზი “ხელოვნური ინტელექტის დანერგვის ამჟამინდელი შეზღუდვები და სირთულეებია”.
შეკვეთების ეფექტურობის გასაუმჯობესებლად, 2021 წლიდან McDonald’s-ი და IBM-ი შეკვეთების ავტომატური აღების ტექნოლოგიაზე მუშაობენ. “თუმცა, იმის მიუხედავად, რომ ტექნოლოგიამ გარკვეული პოტენციალი გამოავლინა, ის სატესტო ადგილებში 2024 წლის 26 ივლისისამდე გამორთული იქნება,” – წერია CNN-ის მიერ გავრცელებულ ინფორმაციაში. ცნობილი ხდება ისიც, რომ McDonald’s-ი ხელოვნური ინტელექტის ერთგული რჩება და გრძელვადიან პერსპექტივაში მომხმარებლის ხმით მიღებულ შეკვეთებს კვლავ AI-ის ანდობს. კომპანიის მენეჯმენტში აცხადებენ, რომ McDonald’s-ი AI სექტორში არსებული ხარვეზების გამოსწორებას აპირებს, რათა სამომავლოდ შერჩეულმა ტექნოლოგიამ გამართულად მუშაობა შეძლოს.
სწრაფი კვების ინდუსტრიის სხვა მოწინავე ობიექტებიც აქტიურად აკვირდებიან ხელოვნური ინტელექტის მიღწევებს. მაგალითად, White Castle-მა დრაივზე მომხარებლის შეკვეთის ავტომატურად მიღებისთვის 2021 წელს სატესტო პერიოდი დაასრულა. ხოლო გასულ წელს Wendy’s-მა AI შეკვეთების მისაღებად რეკომენდაცია Google Cloud-ის პარტნიორ ხელსაწყოს გაუწია. თუმცა, ამ გიგანტი კომპანიების მცდელობებს გამოწვევები შეექმნათ: რიგ შემთხვევებში ხელოვნური ინტელექტის სისტემები მომხმარებლების შეკვეთების არასწორ ინტერპრეტაციას ახდენენ აქცენტებისა და ხმაურის გამო. სწორედ ამიტომ, ახლა დღის წესრიგში მითითებული ხარვეზების დახვეწის აუცილებლობა დგას.
ასე რომ, სწრაფი კვების ინდუსტრიის წამყვანი ობიექტების გამოცდილება დაბალანსებული ინოვაციების აუცილებლობას ასახავს. ეს ნიშნავს, რომ AI გადაწყვეტილებები საიმედოდ უნდა აკმაყოფილებდეს მომხმარებლის სხვადასხვა საჭიროებას. ტექნოლოგიების განვითარებასთან ერთად, სწრაფი კვების ინდუსტრია აგრძელებს ხელოვნური ინტელექტის ინტეგრაციისკენ სწრაფვას და მიზნად ისახავს ისეთი მომავლის შექმნას, სადაც ავტომატური სისტემები მომხმარებელთა დადებით გამოცდილებას გაზრდის!
