ბრიტანულმა სამაუწყებლო კომპანია BBC-მ ახალი გადაცემა წამოიწყო – AI v the Mind, რომლის ფარგლებშიც მეცნიერები ხელოვნური ინტელექტის საზღვრებს შეისწავლიან და მას პლანეტის ყველაზე მძლავრ სააზროვნო “მოწყობილობას” – ადამიანის ტვინს უპირისპირებენ. ჩვენც დაგვაინტერესა მეცნიერების კონკრეტულმა მიგნებებმა და გადავწყვიტეთ, თქვენთვის გაგვეზიარებინა.
ჩვენი ვებ-გვერდის მკითხველებმა უკვე იცით, რომ ამ დრომდე შესწავლილი ფაქტების მიხედვით, AI-ს შეუძლია, კიბოს ისეთი ნიშნები აღმოაჩინოს, რომლებიც ხშირად ექიმების ყურადღების მიღმა რჩება; ხელოვნურმა ინტელექტმა ასევე გაშიფრა ისეთი უძველესი ტექსტები, რომლებიც მკვლევარებმა შესწავლის პროცესში შემთხვევით დააზიანეს; AI-სვე შეუძლია ამინდის პროგნოზირება და ადამიანებს ცხოველებთან კომუნიკაციის ამოხსნაშიც კი გვეხმარება! მრავალი თვალსაზრისით, ხელოვნური ინტელექტი უკვე იმდენად განვითარდა, რომ საინტერესოა, რისი გაკეთება არ შეუძლია მას!
იმის მიუხედავად, რომ თითქმის აღარ დარჩა სფერო, სადაც AI-ს სამუშაოს შესრულება არ შეუძლია, ხელოვნური ინტელექტი ჯერ კიდევ სუსტია ადამიანის გონებასთან შედარებით, როცა საქმე მრავალი დავალების შესრულებას, ანუ ე.წ. Multitasking-ს ეხება. ადამიანის ტვინის ფუნქციის გასამეორებლად შექმნილი ალგორითმებიც კი, რომლებიც ცნობილია როგორც ნერვული ქსელები, ჩვენი გონების შინაგან მუშაობასთან შედარებით ჯერ კიდევ “არ არის დახვეწილი”.
“ადამიანის ინტელექტის შესწავლის დიდი საიდუმლო ისაა, რაც ხელოვნური ინტელექტის სისტემებთან შედარებით, დიდ უპირატესობებს გვაძლევს,” – ამბობს BBC-სთან ქსაკ პიტკოვი, Carnegie Mellon University-ის ასოცირებული პროფესორი, რომელიც ხელოვნური ინტელექტისა და ნეირომეცნიერების კვეთას სწავლობს. “ტვინს მრავალი ღრმა ნევროლოგიური სტრუქტურა აქვს, რომელიც დაკავშირებულია ისეთ სხვადასხვა ფუნქციებთან და ამოცანებთან – როგორებიცაა: მეხსიერება, ღირებულებები, მოძრაობის პატერნები, სენსორული აღქმა და სხვა. სწორედ ეს სტრუქტურები ჩვენს გონებას სხვადასხვა სახის პრობლემის გადასაჭრელად აზროვნების საშუალებას აძლევს. ჯერჯერობით ეს არის ის, რაც რობოტებთან შედარებით, კაცობრიობას ანიჭებს უპირატესობას.”
AI ალგორითმები, რომლებიც დღეს გლობალურ ბაზარზე დომინირებენ, ძირითადად, პროგნოზირების მანქანებია. ისინი უამრავ მონაცემს ამუშავებენ, აანალიზებენ შაბლონებს, რაც მათ საშუალებას აძლევს, მოცემულ კითხვაზე ყველაზე სავარაუდო პასუხი დაადგინონ.
“ფუნდამენტურ დონეზე, ადამიანის შემეცნების დიდი ნაწილი ასევე ორიენტირებულია პროგნოზირებაზე,” – ამბობს პიტკოვი, – “მაგრამ გონება აგებულია მსჯელობის, მოქნილობის, კრეატიულობისა და აბსტრაქტული აზროვნების დონეებისთვის, რომლებიც ხელოვნური ინტელექტის შემთხვევაში, ჯერ კიდევ არ არის ხელმისაწვდომი.”
ChatGPT ან Google-ის Gemini-ს მსგავსი ხელოვნური ინტელექტი საკმარისად კარგად მუშაობს იმისათვის, რომ ჩატბოტებთან მიმოწერისას, გვქონდეს ნამდვილ ადამიანთან საუბრის განცდა, რომელსაც შეუძლია ნებისმიერ კითხვაზე სარწმუნო – თუ ხშირად არაზუსტი – პასუხის გაცემა. მაგრამ რამდენად ეფექტურია თანამედროვე AI-ები? ადამიანებიც კი, რომლებიც ამ ტექნოლოგიას ქმნიან, ყოველთვის არ არიან დარწმუნებული მის შეზღუდვებში.
არის თუ არა AI მზად ნიჭიერი მუსიკოსის სამუშაოს დასაკავებლად? რაც შეეხება ხუმრობას ან კრეატიულ რეცეპტს? შეფ-მზარეულები და კომიკოსები წლებს ხარჯავენ თავიანთი უნარების დახვეწაში ამ სფეროებში პრაქტიკის, გამოცდილებისა და შეცდომების მეშვეობით. აი, ასეთია კითხვები თემაზე “ხელოვნური ინტელექტი თუ ადამიანის გონება”. ჩვენ კი მზად ვართ, სანდო წყაროებზე დაყრდნობით ეტაპობრივად შემოგთავაზოთ სარწმუნო ინფორმაცია ადამიანის შემეცნებით შესაძლებლობებსა და AI-ს შორის.
