დიდიხანი არაა, რაც მსოფლიოს წამყვან ქვეყნებში მსხვილმა კომპანიებმა ხარჯების შესამცირებლად რიგ სპეციალობებზე ხელოვნური ინტელექტის დანერგვა დაიწყეს. შედეგად, დღესდღეობით AI ყველაზე ხშირად ისეთ საპასუხისმგებლო სპეციალობაზე გამოიყენება, როგორიცაა მაგალითად Copywriting-ი.
ამ გადაწყვეტილებამდე მისასვლელად დაკვირვების პროცესი საკმაოდ ხანგრძლივი იყო: კომპანიები პროგრამირებული ხელოვნური ინტელექტის და დასაქმებული ადამიანების ერთობლივ საქმიანობას აკვირდებოდნენ. ეფექტურობა იმდენად მაღალი აღმოჩნდა, რომ კომპანიების დიდმა ნაწილმა Copywriting-ი სრულად ხელოვნურ ინტელექტს ანდო, ნათელი მაგალითი ChatGPT-ია – ხელოვნური ინტელექტის ყველაზე პოპულარული სახე. რაც შეეხება იმ ადამიანებს, რომლებიც ადრე აღიშნულ პოზიციაზე მუშაობდნენ, BBC-ის ინფორმაციით, დიდი ბრიტანეთის სხვადასხვა კომპანიაში მათი როლი ახლა AI-ის მიერ შექმნილი ტექსტების რედაქტირებით შემოიფარგლა.
ეს ტენდენცია ყოველდღიურად კიდევ უფრო მეტ კომპანიაში მკვიდრდება: დღეს უკვე უამრავ ინდუსტრიაში ვხვდებით სხვადასხვა ტიპის AI-ის, რომელიც ადამიანის შესასრულებელ დავალებებს თამამად ართმევს თავს. თუმცაღა ნუ დაგვავიწყდება, რომ მათი შექმნის მთავარი და თავდაპირველი მიზანი კომპანიების ხარჯების შემცირება იყო. და იდეამაც გაამართლა: პროგრამირებულმა ხელოვნურმა ინტელექტმა კომპანიებში დასაქმებული ათეული ადამიანით დაკომპლექტებული გუნდების ჩანაცვლება შეძლო, რაც ეკონომიკური ეფექტიანობის მიღწევად შეიძლება ჩაითვალოს. თუმცა, გასათვალისწინებელია ისიც, რომ AI ხშირად საჭიროებს სხვადასხვა მაღალტექნოლოგიურ სწავლებას, რაც, ძირითადად, IT სპეციალისტების ჩართულობას ითხოვს. ამგვარი სწავლებების საჭიროება არცთუ იშვიათია, რაც, ბუნებრივია, დამატებით ხარჯებს მოითხოვს.
ხელოვნური ინტელექტი ზედმიწევნით ზუსტად ასრულებს ისეთი ტიპის დავალებებს, როგორიცაა, მაგალითად, ტექსტების მომზადება, კრეატიული ხედვა, ფოტო-კონტენტის შექმნა და ა.შ. სწორედ ამ შესაძლებლობების გამო, AI აღიქმება, როგორც “ადამიანებისთვის სამსახურის წამრთმევი რობოტი”. თუმცა ეს დამოკიდებულება ძალიან ზედაპირულია იმის გათვალისწინებით, რომ ხელოვნური ინტელექტის მიერ შესრულებული საქმე, ძირითად შემთხვევებში, ადამიანის მიერ შემოწმებას მაინც ითხოვს; ხოლო თუ ამის საჭიროება არ დგას, AI სპეციალისტის მიერ უნდა დაპროგრამდეს. ამ არგუმენტებით მსხვილი კომპანიები საზოგადოებრივ მღელვარებას პასუხობენ და ამბობენ, რომ “რობოტები დასაქმებულებს სამსახურს არ ართმევენ, ისინი დავალებებს უფრო სწრაფად ასრულებენ, ხოლო ადამიანები – AI-ის მიერ შექმნილი კონტენტის შემოწმებაში უფრო ნაკლებ დროს ხარჯავენ”. ამის გათვალისწინებით, დიდ ბრიტანეთში ზოგიერთი ექსპერტი პროგნოზირებს, რომ სამომავლოდ კიდევ უფრო მეტ AI-თანამშრომელს ვიხილავთ; ექსპერტთა ნაწილის თქმით კი, რობოტების და ადამიანების ერთობლივი თანამშრომლობა მაღალეფექტური იქნება.
გამოწვევების მიუხედავად, მომავალი მაინც ნათელია, ახალ ტექნოლოგიებთან ადაპტირება კი ინოვაციური შესაძლებლობების საწინდარი! რობოტების და ადამიანების კოლაბორაციით, სამომავლოდ ხელოვნური ინტელექტი კიდევ უფრო მეტად განვითარდება, დასაქმებულთა კრეატიულობა და ეფექტურობა კი ამ პროცესში მხოლოდ და მხოლოდ გაძლიერდება! ადამიანს+ხელოვნური ინტელექტი – ამ ფორმულას ახალი როლების შექმნისა და პროდუქტიულობის გაუმჯობესების პოტენციალი აქვს, რომელიც სამუშაო ძალის დინამიურობას გზას გაუხსნის.
