ჩრდილოეთ ამერიკაში, სადაც Amazon-ის ძირითადი სამუშაო ცენტრები მდებარეობს, ყოველდღიურად მილიონობით ამანათის დახარისხება ხდება. დახარისხების პროცესი მრავალფეროვანია და ერთერთი საფეხური სხვადასხვა ტიპის პროდუქციის ვიზუალური დათვალიერებაა, ვიდრე ამანათს საბოლოოდ მომხმარებელი მიიღებს. კომპანია Amazon-ში ამ პროცესს ხელოვნური ინტელექტი – სახელად Project P.I წარმართავს, რომელიც ნივთებზე დეფექტებს ამოწმებს.
კომპიუტერული ხედვის ტექნოლოგიების გამოყენებით, Project P.I. ამოწმებს ისეთ დეფექტებს, როგორიცაა დაზიანებული პროდუქტები ან არასწორი ფერები ან ზომები, სანამ ამანათები მომხმარებლამდე მივა. ეს სისტემა ასევე ცდილობს პრობლემის ძირეული მიზეზების დადგენას, რაც Amazon-ს საშუალებას აძლევს, მომდევნო ჯერზე პრევენციული ზომები მიიღოს.
ეს ერთი შეხედვით მარტივი პროცედურა შემდეგი პრინციპით სრულდება: Amazon-ის მიერ შემუშავებული ხელოვნური ინტელექტი ნივთებს ასკანერებს და მიღებულ მონაცემებს სწავლობს. პროცესი ე.წ. imaging tunnels-ში მიმდინარეობს. თუ AI დეფექტს გამოავლენს, ასეთი პროდუქტი შემდგომი პროცედურებისთვის იზოლირდება. შემდეგ უკვე მოქმედებას Amazon-ში დასაქმებულები აგრძელებენ: ისინი AI-ის მიერ შესაბამისი დროშით მონიშნულ ნივთებს ამოწმებენ და არსებული დეფექტის გათვალისწინებით გადაწყვეტენ, შესაძლებელია თუ არა პროდუქციის ფასდაკლებით გაყიდვა, ჩუქება ან ხელახალი გამოყენება.
დჰარმეშ მეჰთა – Amazon-ის საერთაშორისო გაყიდვების პარტნიორი სერვისების ვიცე-პრეზიდენტი, ხაზს უსვამს ხელოვნური ინტელექტის გამოყენების მნიშვნელობას დაზიანებული პროდუქტების ეფექტურად აღმოსაჩენად, მომხმარებელთა სარგებლის, სავაჭრო პარტნიორებისა და გარემოსთვის. მეჰთა ამბობს, რომ მომხმარებლამდე დაზიანებული ნივთების მიწოდების თავიდან აცილება ამცირებს არასასურველი ამანათების უკან დაბრუნების შემთხვევებს, ხელახალი შეფუთვის საჭიროებას და დამატებითი ტრანსპორტირებისგან გამოწვეულ ნახშირბადის გამონაბოლქვს.
Amazon ასევე იყენებს გენერირებად AI სისტემას Multi-Modal LLM-ით (MLLM), რათა ხარვეზები დროულად გამოავლინოს და თავიდან აიცილოს. ეს სისტემა აანალიზებს მომხმარებელთა უკუკავშირს, რათა გაიგოს და გადაჭრას უარყოფითი გამოცდილების ძირითადი მიზეზები. დეფექტებზე ხელმისაწვდომობით Amazon ეხმარება თავის სავაჭრო პარტნიორებს მომავალში შეცდომების თავიდან აცილებაში.
ასე რომ, ხელოვნური ინტელექტის მიმდინარე მიღწევებით, Amazon-ი აგრძელებს მომხმარებლებისა და პარტნიორების გამოცდილების გაუმჯობესებას!
