Amazon-მა ახალი თაობის Alexa წარმოადგინა, რომელიც გენერაციული ხელოვნური ინტელექტითაა აღჭურვილი. გიგანტ კომპანიაში იუწყებიან, რომ ახალი AI სისტემა შეუფერხებლად აერთიანებს მსხვილ ენობრივ მოდელებს, აგენტურ შესაძლებლობებს და სერვისებისა და მოწყობილობების უზარმაზარ ქსელს, რომელიც შეიქმნა საუბრის, პერსონალიზაციისა და ამოცანების შესრულების გასაუმჯობესებლად.
ახალი თაობის Alexa სრულიად ახალი არქიტექტურული დიზაინით აიგო, რომელიც რობოტს ათასობით API-სთან აკავშირებს. ეს კი მომხმარებლებს საშუალებას აძლევს, დაუკავშირდნენ ისეთ პლატფორმებს, როგორებიცაა GrubHub, Uber, Spotify და ჭკვიანი სახლის მოწყობილობები. Alexa-ს ასევე შეეძლება მრავალსაფეხურიანი დავალებების შესრულებაც, რაც მას კიდევ უფრო მეტად ამსგავსებს რეალურ პერსონალურ ასისტენტს – Alexa ახლა უკვე ისეთ რთულ დავალებებს შეასრულებს, როგორიცაა დაჯავშნა და კონტაქტებისთვის სხვადასხვა შეტყობინების გაგზავნა.
ამ ყოველივეს გარდა, Amazon-მა შეიმუშავა სისტემები, რომლებიც ხელოვნური ინტელექტის შეცდომებს ამცირებს: Alexa 200-ზე მეტ ცნობილ საინფორმაციო წყაროსთან პარტნიორობს, მათ შორის Reuters-სა და The Washington Post-თანაც, რაც რეალურ დროში სანდო ინფორმაციის მიღების გარანტიაა. ახალ რობოტს შენარჩუნებული აქვს სახასიათო თვისებებიც – თანაგრძნობის, იუმორის და ინკლუზიურობის გრძნობები. ამის გარდა, Alexa დროთა განმავლობაში სწავლობს მომხმარებლის პრეფერენციებს უაღრესად პერსონალიზებული პასუხების მიწოდებისთვის.
როგორც უკვე გითხარით, ტრადიციული API-ების მიღმა, ახალი თაობის Alexa-ს უკვე აგენტური შესაძლებლობებიც აქვს, რაც მას საშუალებას აძლევს, ვებგვერდებზე სწორი ნავიგაცია მოახდინოს და მომხმარებლების სახელით გარკვეული ამოცანებიც დაასრულოს.
