წლის ერთ-ერთმა ყველაზე მნიშვნელოვანმა საშოპინგო დღესასწაულმა – Cyber Monday-იმ ჩაიარა. ეს მსოფლიოში ერთ-ერთი ყველაზე დიდი სავაჭრო დღეა, თუმცა შოპინგის შემდეგ ალბათ ყველას გვაინტერესებს, რამდენად სწრაფად მივიღებთ ჩვენს ამანათებს.
ახალი ამბავი არაა, რომ ამ პროცესების დასაჩქარებლად მსოფლიო გიგანტი სავაჭრო კომპანია Amazon-ი ხელოვნურ ინტელექტს იყენებს. კომპანიაში აცხადებენ, რომ სწორედ AI ეხმარება Amazon-ს ყველა სერვისის წარმართვაში, რასაც იყენებენ.
“ეს არის ის, რასაც მომხმარებელი ვერ ხედავს და გრძნობს, თუმცა ისეთივე კრიტიკული მნიშვნელობისაა, როგორც ჟანგბადი. როცა მომხმარებელი ვერ ხვდება, რომ AI აქაა, ეს ნიშნავს, რომ ის იდეალურად მუშაობს,” – ამბობს Amazon-ის ტექნოლოგიური დაგეგმვის დეპარტამენტის ვიცეპრეზიდენტი კოტ ჰამილტონი.
მისივე თქმით, სწორედ ხელოვნური ინტელექტი წარმართავს Amazon-ის ვებ-გვერდს, საიდანაც მომხმარებელს უამრავი სასურველი პროდუქციის დათვალიერება და შეძენა შეუძლია, შემდეგ AI შეკვეთებს აორგანიზებს, მათ ფუთავს და საბოლოოდ მომხმარებელთან შესახვედრად ამზადებს. უფრო ზუსტად კი, Amazon-ის ხელოვნური ინტელექტის ყოველდღიური რუტინა ასეთია:
- პროდუქციის სწორ კოორდინატებზე შენახვა – სანამ მომხმარებელი ონლაინ მაღაზიაში კონკრეტული ნივთის შესაძენად დაკლიკავს, Amazon-ის მიწოდების ჯაჭვის ოპტიმიზაციის ტექნოლოგია უკვე მუშაობს. ეს ტექნოლოგია ყოველდღიურად 400 მილიონზე მეტ პროდუქტს აორგანიზებს, რაც გულისხმობს იმის პროგნოზს, თუ რომელი პროდუქტი რა რაოდენობით და სად უნდა იქნას შენახული. ცხადია, AI მომხმარებელთა მოთხოვნის და პროდუქციის მახასიათებლების ფაქტორებს ეყრდნობა. ეს სისტემა Amazon-მა 10 წლის წინ დანერგა, რამდენიმე წელიწადში კი პროგნოზის სიზუსტის მაჩვენებელი (ანუ რა უყვარს მომხმარებელს ყველაზე მეტად) 15-ჯერ გაიზარდა. ეს პროგრესი კი გიგანტ კომპანიას საშუალებას აძლევს, რომ პროდუქციის კიდევ უფრო დიდი არჩევანი შეინახოს და ისინი მომხმარებელს კიდევ უფრო სწრაფად მიაწოდოს.
- მობილური რობოტების დახმარება შეკვეთების შესრულებაში – რობოტი მოწყობილობები მორიგი მაგალითია იმისა, თუ როგორ ეხმარება ხელოვნური ინტელექტი Amazon-ის თანამშრომლებს იმაში, რომ ამანათები მომხმარებლებთან მისაწოდებლად კიდევ უფრო სწრაფად გამზადდეს. ხელოვნური ინტელექტის მქონე რობოტები აღჭურვილნი არიან ავტომატური ხედვით, რაც ნიშნავს, რომ მათ შეუძლიათ, ასობით მილიონი პროდუქცია ამოიცნონ, დაახარისხონ და შეამოწმონ, სანამ ისინი შესაფერისად შეიფუთება და ტრანსპორტირებისთვის გაემზადება. ამისთვის Amazon-ი გენერაციულ AI-ის იყენებს ფორს-მაჟორულ სიტუაციებთან გასამკლავებლად – ანუ აკეთებს სხვადასხვა სცენარის სიმულაციებს, რომლებსაც შესაძლოა რობოტები ისეთ პიკურ დღეებში შეხვდნენ, როგორიცაა “კიბერ ორშაბათი”. AI Amazon-ს ასევე ეხმარება მსოფლიოში უდიდესი მოძრავი ინდუსტრიული რობოტების ფლოტის ორგანიზებაში. როგორც კი მომხმარებელი ღილაკზე პროდუქციის შესაძენად დაკლიკავს, შესაბამისი პროგრამა 750,000 მობილური რობოტიდან ერთერთს აგზავნის ინვენტარისა და შეძენილი ნივთების მოსაზიდად. მას შემდეგ, რაც ერთი რობოტი ისწავლის უფრო ეფექტურ ნავიგაციას, მთელი ფლოტი იმავე უნარს იძენს. მობილური რობოტი კონკრეტულ პროდუქტს პოულობს, იატაკიდან წევს და ამაზონის თანამშრომელთან მიაქვს, რომელიც ასკანირებს, იარლიყს აკრავს და შესაფუთად ამზადებს.
- ამანათების დახარისხება სწრაფი მიწოდებისთვის – ამანათების შეფუთვისა და ეტიკეტირებისთანავე, Amazon-ის თანამშრომლებს ეხმარებათ რობოტი, სახელად “რობინი”. რობინი ამანათებს ახლა უკვე ტრანსპორტში ჩასაწყობად ამზადებს იმ მისამართების და რიგითობის მიხედვით, სადაც მათი მიწოდება უნდა მოხდეს. რობინი ხელოვნური ინტელექტის გაძლიერებული ხედვის სისტემას იყენებს იმის გასაგებად, თუ რა ობიექტებია იქ – სხვადასხვა ზომის ყუთები, რბილი პაკეტები თუ კონვერტები და მათ ისე აწყობს, რომ ტრანსპორტირებისას არ დაზიანდეს.
- გასავლელი მარშრუტის დაგეგმვა – ამანათების მოგზაურობისას ბოლო გაჩერება მომხმარებლის მიერ მითითებული მისამართია და, რა თქმა უნდა, გზად ყოველთვის ხდება გაუთვალისწინებელი შემთხვევები: საცობები, ცუდი ამინდი და ა.შ., რასაც პოტენციურად ამანათის მიწოდების გაჭიანურება შეუძლია. ხელოვნური ინტელექტი Amazon-ს ამ მხრივაც ეხმარება და ოპტიმალურ მარშრუტებს უგეგმავს.
თქვენ ახლა გაეცანით, თუ როგორ ეხმარება ხელოვნური ინტელექტი Amazon-ს, ხოლო თუ გაინტერესებთ, რა შესაძლებლობები აქვს კომპანია USA2GEORGIA-ს AI-ის, შეგახსენებთ ამ სტატიას.
