ხელოვნური ინტელექტი რომ ჩვენი საქმიანობის გასამარტივებლად დღითიდღე იხვეწება, ამაზე მორიგი საინტერესო ფაქტიც მეტყველებს – გარდა სხვადასხვა ინდუსტრიაში დასაქმებულთა მრავალფეროვანი “დახმარების” შესაძლებლობისა, AI უკვე გადაყრილი ნაგვის გაანალიზებასაც ახერხებს.
The New York Times წერს, რომ ამერიკის რესტორნებსა და მარკეტებში სწორედ ხელოვნურ ინტელექტს იყენებენ იმისათვის, რომ შეაფასონ, მომხმარებლები რა პროდუქტებს ყრიან.
საკვების ნარჩენები გლობალურად უდიდესი პრობლემაა. Business Insider-ის მონაცემებით, მხოლოდ ამერიკაში მოყვანილი პროდუქტების 30%-40% იყრება. გადაყრილი საკვების დიდი ნაწილი კი კომპოსტირების ნაცვლად, ნაგავსაყრელზე ხვდება.
ამ პრობლემასთან საბრძოლველად, ამერიკულ კომპანიათა ნაწილი სწორედ ხელოვნურ ინტელექტს იყენებს და ამით ისინი აანალიზებენ, რესტორნებსა და სასურსათო მაღაზიებიდან რომელი პროდუქტი რა რაოდენობით იყრება. მიღებული მონაცემების მიხედვით, შედარებით მცირე რაოდენობით ხდება იმ საკვები პროდუქტების შეძენა, რომელიც უფრო ხშირად იყრება ნაგავში; ზოგიერთი პროდუქტი კი საერთოდ მენიუდან ქრება კიდეც. რესტორატორები ამბობენ, რომ ნარჩენების მონიტორინგის გზით, შესყიდვის ხარჯი 8%-ით შემცირდა.
სამწუხაროდ, სურსათის ნარჩენების პრობლემა საკმაოდ აქტუალურია, განსაკუთრებით მზარდი გლობალური მოსახლეობის გათვალისწინებით, რომელიც 2050 წელს, სავარაუდოდ, 9 მილიარდს გადააჭარბებს. ამასთან, გაერო-ს გარემოს დაცვის პროგრამის თანახმად, სიღარიბეში მცხოვრები ადამიანები თავიანთი შემოსავლის 50%-დან 80%-მდე მხოლოდ საკვებზე ხარჯავენ.
