AI, რომელიც ერთ დროს მოსწავლეებისთვის ესეების დასაწერად დამხმარე საშუალება იყო, ახლა უკვე დასავლეთის ქვეყნებში სასწავლო პროცესის ნაწილია. BBC წერს, რომ დიდი ბრიტანეთის სკოლებში ხელოვნური ინტელექტის ტექნოლოგიებს მასწავლებლები და მოსწავლეები სხვადასხვა ფუნქციით დღეს უკვე თამამად იყენებენ.
გამოცემის მიხედვით, დიდი ბრიტანეთის დასავლეთ სასექსის პანსიონატში მოსამზადებელ სკოლას ხელოვნური ინტელექტის უფროსი მასწავლებელი ჰყავს, რომელიც საქმიანობს როგორც „თანაპილოტი“ სკოლის ადამიანური რესურსების ხელმძღვანელ ტომ როჯერსონთან ერთად. ბრიტანეთის მთავრობა აცხადებს, რომ AI-ს “განათლების სფეროს გარდაქმნის ძალა აქვს”.
დიდი ბრიტანეთის სამხრეთ-აღმოსავლეთის სკოლები ხელოვნურ ინტელექტს ისეთი ამოცანებისთვის იყენებენ, როგორიცაა, მაგალითად, სამუშაო ფურცლების ფორმატირება. ამასთან ერთად, Cottesmore-ის სკოლის AI მასწავლებლებს და სკოლის თანამშრომლებს სასწავლო პროცესებთან დაკავშირებულ სხვადასხვა საჭირო რჩევას აძლევს და დამატებითი საჭიროებების მქონე მოსწავლეებსაც ეხმარება. ბრიტანეთის სკოლებს AI ტუტორებიც ჰყავს, რომლებიც რეალური მასწავლებლების არყოფნის შემთხვევაში მათ ცვლიან. გარდა ამისა, Pease Pottage-ის სკოლას აქვს პროექტი “ჩემი მომავალი სკოლა”, სადაც მოსწავლეები AI-ის დახმარებით თავიანთი წარმოსახვით სრულყოფილ სკოლას ქმნიან. ამაზე დაყრდნობით კი სკოლა ცდილობს, მოსწავლეების საჭიროებებს ზუსტად უპასუხოს.
Surrey-ის უნივერსიტეტის ციფრული სწავლების ხელმძღვანელმა დოქტორმა კრის ტრეისმა განაცხადა, რომ “ხელოვნური ინტელექტი [განათლების სფეროში] დარჩება და მომავალი სამუშაო ძალის განუყოფელი ნაწილი იქნება”. მისივე თქმით, AI-ს შეუძლია თვალყური ადევნოს მოსწავლის პროგრესს, რათა გამოვლინდეს მისი ძლიერი მხარეები და გასაუმჯობესებელი სფეროები. ხოლო ამავე უნივერსიტეტის კიდევ ერთი დოქტორი – ტომ როჯერსონი თვლის, რომ ხელოვნური ინტელექტი განათლებას სწავლების პერსონალიზებული და ეფექტური მეთოდების შეთავაზებით დადებითად შეცვლის. ასე რომ, ორივე პროფესორი განათლების სფეროში ხელოვნური ინტელექტის ნათელ მომავალს ხედავს.
ბუნებრივია, სასწავლო პროცესებში ხელოვნური ინტელექტის ჩართულობისთვის მასწავლებლების და მოსწავლეების როლი დიდია, რათა AI-მ საკუთარი შეზღუდვებიც ისწავლოს. პროფესორები მეცნიერებთან ერთად თანხმდებიან, რომ ტექნოლოგიის ზედმეტი ჰუმანიზაცია საჭირო არაა. დოქტორი ტრეისი ხაზს უსვამს ხელოვნური ინტელექტის უპირატესობებისა და რისკების შესწავლის აუცილებლობას. მთავარი შემაშფოთებელი გარემოება მოსწავლეების მიერ პლაგიატიზმის პოტენციური რისკია – ხელოვნური ინტელექტის გამოყენებით. მეცნიერები თანხმდებიან, რომ ხელოვნური ინტელექტის მიერ გენერირებული სამუშაოს აღმოჩენა რთულია და რომ მოსწავლეებში ტექნოლოგიების არათანაბარმა ხელმისაწვდომობამ შეიძლება AI-ის მინუსები გაზარდოს.
ასე რომ, ეთიკურობა ყველა სფეროში მნიშვნელოვან როლს ასრულებს, მათ შორის ხელოვნური ინტელექტით სწავლებაშიც. მეცნიერები ასევე გვარწმუნებენ, რომ AI-ის შესაძლებლობებისა და რისკების წინასწარი შესწავლა მისი პოტენციალის რეალიზებისთვის აუცილებელია.
