Google დიდ ბრიტანეთში მონაცემთა ბაზის პირველი დიდი ოფისის მშენებლობას იწყებს – ინვესტიციამ 1 მილიარდი დოლარი შეადგინა. ამის შესახებ BBC წერს. გამოცემის ცნობით, მშენებლობა ჰერტფორდშირში, Waltham Cross-ში 33 ჰექტარზე უკვე დაწყებულია. ტექნოლოგიური გიგანტი კომპანია იმედოვნებს, რომ ის 2025 წელს დასრულდება.
ჯერ უცნობია, ბრიტანეთში აშენებულ მონაცემთა ბაზის ცენტრში დაზუსტებით რამდენი სამუშაო ადგილი შეიქმნება, თუმცა ახალ ოფისს ნამდვილად დასჭირდება ინჟინრები, პროექტის მენეჯერები, მონაცემთა ცენტრის ტექნოლოგები, ელექტრიკოსები, კვებისა და უსაფრთხოების თანამშრომლები. გაერთიანებული სამეფოს პრემიერ-მინისტრი რიში სუნაკი კი ამბობს, რომ Google-ის ეს გადაწყვეტილება დიდ ბრიტანეთს “განვითარების უზარმაზარ პოტენციალს აძლევს”.
Google-ის პროექტი ბრიტანეთში მსხვილი ამერიკული ტექნოლოგიური კომპანიის უახლესი ინვესტიციაა მას შემდეგ, რაც Microsoft-მა გამოაცხადა, რომ დიდ ბრიტანეთში ხელოვნური ინტელექტის (AI) მონაცემთა ცენტრების გაფართოებისთვის 2,5 მილიარდი ფუნტი სტერლინგის ინვესტიციას ჩადებს.
ამ სიახლით ჰერტფორდშირის ახალი ობიექტი Google-ის 27 მონაცემთა ცენტრს დაემატება. ეს ცენტრები მთელ მსოფლიოშია განლაგებული, კერძოდ, 11 სხვადასხვა ქვეყანაში და ამერიკის 13 შტატში იყრის თავს. წინასწარი ცნობით, ახალი ოფისი „გადამწყვეტ როლს შეასრულებს კომპანიის AI ინოვაციების მხარდაჭერაში და დიდ ბრიტანეთს საჭირო შესაძლებლობებს მიაწვდის“.
